Am Morge sind mir mit Pirates of the Caribbean vom Horn, de Flöte und em Saxophon gweckt wurde. Noch em Zmorge hemmer de Michi, euse Registerleiter vom Schlagzüg, döffe verabschide und send denne id Registerprobe gange, das bis öppe am halbi elfi. Drufabe hemmer euse Lunch füre Mittag a de Lunchstross abgholt.
Punkt elfi isches losgange zum Start vom Foxtrail. Dete hemmer euse Lunch gnosse und send nachher in verschiedene Gruppe gstafflet in Foxtrail gstartet. Ned alli hends so eifach gha, die einti Gruppe het sich sogar verloffe. S’Ziel vom Foxtrail, am Bettmersee, het im Restaurant es Glace und öppis z Trinke botte. Es paar Lüt hend sogar s’Badzügs gholt und send sech in ca. 15 Grad chalte See go abchüele.
So semmer zrugg is Lagerhus cho und hend de Markus (Registerleiter Holz) verabschiedet. Er isch höt sogar am Aletsch-Gletscher gsi und het dete kontrolliert, öb de Gletscher echt würkli no dete isch. Und tatsächlich isch er no dete gsi! Drufabe hets es super feins Znacht ge, nämlich Teigware mit Ghacktem und Öpfelmues. Zletscht hemmer na di obligatorischi Gsamtprob am Obe gha. Nachem usgezeichnete Dessert hets denn no en Rundi Werwölfle ge und nochher isch es au scho weder is Bett gange.
Tobias B., Tobias M., Fiona und Richi (Michel)
Kommentarspalte geschlossen