Gweckt simmer vo grauehaftem Lärm worde, es het sich denn usegstellt, es sind nume d Schlagzüger. Die hätte selle wecke und ned eus verschrecke. S’Zmorge isch hüt vo deliziösem Rüehrei ergänzt worde. Nacher isches mit astrengende und intensive Registerprobe wiitergange. Mer hend mit eusne engagierte Registerleiter d Stück vo hinde bis vore durekätschet. Bim Zmittag hämer weniger kätschet und mehr gschlunge, die feine Nudle mit Gmüessosse sind nämlich abe wie nüt. Aschlüssend hämer en lange Mittagspause gnosse, mer hend eus erholt und send gstärcht id Probe gstartet.
Im Register hämer grossi Fortschritt gmacht bi eusne Stück und händ eus sehnlichst uf d Pause gfreut. Bim Zvieri simmer vonere grosse Uswahl a Köstlichkeite überrascht wurde. Vom Urs simmer denn usegschickt wurde go Tannezapfe sueche, damit mer echli früschi Luft verwütsched. Es paar chönd sich nämlich schlecht vo ihrem mobile Funkgrät trenne.
Bis zum Znacht hämer elei eusi musikalische Baustelle dörfe bearbeite. Am 6i hets feine Toast Hawaii ge und gwüssi sind bim Urs sinere Asprach am Handy gsii. Ein Saxophonist isch so versunke i sis unglaublich relevante Spieli gsii, dass er total verschrocke isch, wo ihm öper vors Gsicht klatscht het. Nach dem amüsante Ereignis isches am halbi 8i wiiter gange mit de Gsamtprob. Während de Prob het de Urs pro Wort, wo mer gschwätzt händ, 1 Minute verlängeret. Trotzdem hämer hüt gseh, wie mer eus verbesseret händ.
Luisa, Partizia, Kilian und Meret
Kommentarspalte geschlossen