Nachere Improvisationssession bestehend us zwei Blechblasinstrument und diverse Perkussionselement sind am Friitig die einte meh und die andere weniger fit wieder am Zmorgetisch ghocket und hend es letzts Mal derfe s feine Zmorge gnüsse (am Samstig längts denn ebe meistens nur na für Schoggimilch und Weggli). Denn hets im Keller en Gsamtprob geh und aschlüssend hemmer s ganze Perkussionsmaterial zum erste vo vielne Mal a dem Tag ufe a die früschi Luft züglet. Dete isch d Gsamtprob denn wiitergange damit mir eus scho mal ade Klang dusse chönnd gwöhne.
Am Namitag hemmer nämlich zwei Openair Konzert derfe spiele und zeige was mir i dere Wuche alles glernt hend.Es letzts Mal für de Tag hemmer denn s Perkussionsmaterial umetreit und sind hei ga Raclette esse…will was wäred Berge ide Schwiiz und es Musiklager ohni es guets Raclette 🙂 Dete het denn au en Starrwettbewerb zwüsche zwei vo eus aagfange, wo tatsächlich en Stund gange isch (vieli hends scho fasch als Flirt bezeichnet;) ).
Wiitergange ischs denn mitem bunte Abig womer de rot Fade irgendwie chli verlore hend. Vonere Modeschau, eme Song-Rate bis es Stück bildlich darstelle isch alles debii gsi. Denn hets gheisse mir selled eus alli warm aalegge und usegah womer de Abig am Lagerfüür mit Marshmallows hend la usklinge. Für d Leiter isch am 12i fertig gsi, aber für eus isch de Abig ersch denn losgange. Am Samstig sind denn immerhin alli meh oder weniger pünktlich ufgstande und jetzt simmer leider scho wieder ufem Weg hei. Und damit isch au Ziit zum DANKE sege a alli wo das Lager wiedermal unvergesslich gmacht hend!
Paul, Moritz, Lilly, Johannes, Elena
Kommentarspalte geschlossen