‘S Wecke vom Saxophon-Register isch leider e chli liislig usgfalle – deswege isch ‘s z’Morge am Afang schwach frequentiert gsi. Nachdem alli gässe hend, isch’s für alli id Registerprob gange. Nach dem mer erfolgrich probet hend, hämmer euse lunch gfasst und eus für eusi alljöhrlichi Wanderig ready gmacht. Leider hets au do bi de Pünktlichkeit ned klappt. In Filisur mit dem ÖV acho, simmer scho losgwandert. Mer hend det aber nonig gwüsst, wo’s ane goht. Uf einisch simmer denn vorem 65 Meter höche und 136 Meter lange Landwasserviadukt i de Nöchi vom Filisurer Bahnhof gstande. Das isch en imposanti Brugg, wo sit 2008 zum UNESCO-Weltkulturerbe ghört. Dete hets en chlini Stärchig geh. Will uf eus die nöchsti Überraschig gwartet het, hämmer scho müesse witer laufe. Zrugg am Filisurer Bahnhof acho, isch eus imene Kafi Glacé/Chueche und es Getränk vo de MG Othmarsingen offeriert worde.
A dere Stell möchte mer eus herzlich bi de MG Othmarsingen bedanke. Au möchte mer eus bim Tobi (Bachme) für die wunderschöni Wanderig bedanke. Nach enere chli stressige Busfahrt simmer denne au scho wieder zrugg in Parpan gsi, wo mer eus frisch gmacht und echli erholt hend. D’ Chuchi het i dere Ziit schmackofatzi Güggeli und Härdöpfel gchochet. Mer hends z’Nacht richtig chönne gnüsse. D’ Ämtli sind im Aschluss as z’Nacht gmacht worde und denne het no jede Ziit gha, individuell sini Schwachstelle zu Lieblingsstelle z’verwandle. Will mer sehr erschöpft gsi sind, simmer nach es paar Ründli Werwölfle au scho go schlafe, demit mer für de Donnstig parat sind.
Oskar, Kilian, Paul, Johannes
Kommentarspalte geschlossen