Mit de unglaublich schöne Posunekläng simmer hüt alli am halbi achti usem Tüfschlaf grisse wurde. Am nüni simmer denn au scho i de erste Registerprob gsesse, nachdem eusi Chuchi eus es einzigartigs Zmorge zaubert het. I dene erste Probe sind die grösste Brocke scho mol zerchlienert wurde. Nach de erste Läuf und Rhythmusanalyse hets au scho wieder en Pause geh, die mit Öpfelschnitzli und Schoggistängeli verfeinert wurde isch. Wie am Samstig hemmer au do wieder chli Volley gspillt. Ahschlüssend hemmer alli nomol güebt, bevor mer euses hert verdiente Zmittag hend chönne gnüsse. Hüt hend eus de Andy und de Peter Chicken Nuggets mit Pommes zaubert. Denn hend alli ihri Ämtli gmacht und plötzlich simmer scho wieder am Probe gsi, mit grosser Freud und Lernbereitschaft natürlich. Leider hend eus vor dere Prob die erste Musiker au scho wieder verlah, dafür sind aber au es paar neui dezue cho. Nach de Prob het eus de Urs 1 ½ Stunde frei geh, die sind natürlich direkt i die neu Lieblingslageraktivität ihgflosse, is Volleyball. Es letschtes Mal für hüt het d Chuchi nomol für eus zaubert, zum Znacht hets nämlich Raclette geh. Jetzt mache mer no en Gsamtprob damit mer euses neu glernte au direkt chönnd zeige.
Paul, Martin, Gian
Kommentarspalte geschlossen